Kinta, 28 Marsu 2024
banner_top_2
Notisia
Portugal Telecom aprezenta planu estratéjiku husi Timor Telecom
Sábadu, 19 Setembru 2009 23:40

Iha fulan Setembru liu bá, Prezidente Portugal Telecom, Zainal Bava, mai Díli atu aprezenta Timor Telecom ninia planu estratéjiku foun , hó objetivu atu fó tán forsa bá investimentu iha área Telecomunikasaun iha Timor Leste.


Tuir Zainal Bava, “planu ida ne’e define etapa nó estratejia foun, nune’e mós dezenvolvimentu nó implementasaun servisu foun, solusaun teknolojia, marka foun, ne’ebe reflete empreza ninia komprimisu hó Timor Leste”.

Zainal Bava explika katak PT mak pioneiru TT nian bá investimentu infra-estrutura sistema telecomunikasaun..

“Hanesan operadora ativa bá ekonomia Timor Leste nian, ne’e estrutura bo’ot nó oi-oin, ne’ebe fornese asesu bá informasaun nó habelar hó baze iha klienti sira, ne’ebe to’o ohin hamutuk rihun 220 nó to’o tinan ne’e remata sei sa’e bá rihun 300”, nia hatutan.

Bá Zainal, infra-estrutura telekomunikasaun iha rai ida ne’e sei diak liu tán liu husi aumentu kobertura rede móvel nó fixu, habelar rede 3G bá zona urbana sira hotu, harí kabu submarinu ida ne’ebe sei liga Timor Leste hó mundu, loke tán loja nó aumenta númeru ajenti sira. Objetivu prinsipal mak to’o iha tinan hat nia laran sei to’o bá pursentu 90 husi populasaun hó asesu telefone.


Sorumutu hó Primeiro Ministro Xanana Gusmão

Prezidente PT ne’ebe akompaña husi Administrador Delegado TT, Manuel Amaro, hasoru malu hó PM Xanana Gusmão nó Ministra Finansas, Emília Pires, hó intensaun atu hato’o polítika TT nó aumentu kobertura rede nian, asesu telefone iha distritu 13 ne’ebe sei to’o bá pursentu 90 husi populasaun.

“Ami hasoru malu hó PM atu koalia kona bá komprimisu TT nian iha espansaun investimentu iha TL, hadi’an kobertura rede telekomunikasaun ne’ebe klienti sira merese atu hetan” Zainal explika.

Tuir PM nó Ministra Emília Pires, politika atu hamosu lei liberalizasaun atu kompanhia seluk bele tama lá so deit atu haré ba kompetisaun direta ho TT, maibe atu hatán bá preokupasaun nó ejijensia husi klienti sira ne’ebe husu Governo atu hatama operador foun.

Zainal Bava laran metin katak” hafoin fulan nen, bainhira nia fila fali mai vizita TL, iha ona mudansa nó melhoria iha telekomunikasaun” nó katak “ importante mak ekipa ne’ebe servisu nó PT fó apoiu, atu nune’e iha tempu oin mai TT bele hadi’a ninia imajen” nia konklui.