|
|
Timor Telecom, S.A., (“TT”) nu’udar operadora iha área Telekomunikasaun nian ho Rede Fiksu no Movel iha Timor-Leste, no iha área seluk tan komunikasaun eletrónika nian. TT iha kompromisu hodi hala’o protesaun ba dadus pesoál hosi Kliente/Utilizadór sira kona-ba produtu no servisu ne’ebé uza, nomós, titulár sira hotu nia dadus iha situasaun hotu-hotu bainhira tenke tama liu ema nia dadus no, tan ne’e duni, iha kontestu ne’e, elabora Polítika ida-ne’e ne’ebé la’o hamutuk ho kompromisu atu halo tuir regras protesaun nian ba ema nia dadus.
TANBASÁ MAK TENKE IHA POLÍTIKA PROTESAUN BA EMA NIA DADUS?
Atu fó hatene ba Kliente/Utilizadór sira, liuhosi polítika ida-ne’e, kona-ba regra jerál prosesamentu dadus nian, ne’ebé foti no trata tuir de’it saida mak iha lejislasaun ba protesaun ema nia dadus nian, ne’ebé iha iha momentu ida-idak, liuliu tuir Artigu 36 no 38 hosi Konstituisaun Repúblika Demokrátika Timor-Leste nian nomós Dekretu Governu n.º 9/2008 ho data 16 Abríl ne’ebé Regulamenta knaar servisu rede movel nian.
TT haktuir de’it matadalan di’akliu nian iha área seguransa no protesaun ba ema nia dadus nomós hatuur medida téknika no organizativa atubele la’o tuir lejislasaun ba protesaun ema nia dadus no garante katak bainhira tama liu ema nia dadus tenke ho legalidade, lealdade no transparénsia, nomós konforme knaar ne’ebé autoriza ona.
TT hatebes protesaun no konfidensialidade ba ema nia dadus, nomós adota medidas ne’ebé konsidera natoon atubele asegura loloos ema nia dadus integridade no konfidensialidade nian, nomós direitu sira seluk ne’ebé titulár sira iha.
Regras ne’ebé hatuur iha Polítika ne’e ba Protesaun Ema Nia Dadus hatutan ho hirak seluk ne’ebé hakerek tiha iha kontratu ne’ebé Kliente/Utilizadór sira asina ho TT, nomós ho termu no kondisaun produtu nian no servisu oioin, ne’ebé publika hela iha website ida-idak.
POLÍTIKA BA PROTESAUN EMA NIA DADUS NIAN HALUAN TO’O NE’EBÉ?
Polítika ida-ne’e ba Protesaun Ema nia Dadus aplika de’it ba rekolla no prosesamentu ba ema nia dadus nu’udar TT nia responsabilidade bainhira disponibiliza servisu no produtu ba Kliente/Utilizadór sira no iha situasaun hotu-hotu bainhira TT presiza tama liu ema nia dadus liuhosi hala’ok ba intervensaun sosiál.
Iha TT nia website rasik bele iha link sira ba website seluk ne’ebé la’os TT nian. Link hirak-ne’e tama ho boa fé maibé TT la’ós responsavel bainhira iha rekolla no prosesamentu ba dadus ema nian liuhosi website ne’ebá, no TT mós la responsavel ba konteúdu hosi website hirak-ne’e rasik, mak hanesan sira-nia ezatidaun, kredibilidade no funsionalidade sira.
SAIDA MAKA EMA NIA DADUS?
Ema nia dadus nu’udar informasaun ne’ebé de’it, ho natureza oioin no la haree ba tipu suporte ida-ne’ebé, bele inklui aúdio no imajen, kona-ba ema individuál ne’ebé identifikadu ka identifikavel.
Ema identifikavel maka ema individuál ida-ne’ebé bele identifika, diretamente ka indiretamente, liuhosi naran, númeru identifikasaun , dadus hela-fatin nian, identifikadór eletróniku ka elementu seluk hosi identidade fízika, fiziolójika, jenétika, mentál, ekonómika, kulturál ka sosiál.
PROSESAMENTU BA EMA NIA DADUS MAKA OINSÁ?
Prosesamentu ba ema nia dadus konsiste hosi operasaun ida ka operasaun lubuk balu kona-ba ema ida nia dadus ka lubuk balu mós, liuhosi meius automátiku, ka lae, hanesan ba rekolla, rejistu, organizasaun, estruturasaun, konservasaun, adaptasaun, rekuperasaun, konsulta, utilizasaun, divulgasaun, difuzaun, komparasaun, interkoneksaun, limitasaun, apagamentu ka destruisaun.
SÉ MAKA RESPONSAVEL BA PROSESAMENTU EMA NIA DADUS?
TT maka entidade nu’udar responsavel ba prosesamentu ema nia dadus no determina finalidade no meius hodi hala’o prosesamentu hirak-ne’e. Kona-ba ida-ne’e, bainhira titulár dadus nian presiza karik, bele kontaktu hodi hakerek ba responsavel prosesamentu nian ba:
Timor Telecom, SA.
TIMOR PLAZA
Rua Presidente Nicolau Lobato
4º Piso - Caixa Postal 135
Comoro - Díli
Timor-Leste
DADUS SIRA-NE’EBÉ MAKA ATU PROSESA?
Kona-ba atividade ne’ebé dezenvolve, TT hala’o prosesamentu ema nia dadus ne’ebé presiza duni hodi hala’o servisu no/ka fornese ninia produtu sira, nomós, ho nivel intervensaun sosiál, sei tama liu ba dadus hanesan naran, hela-fatin, númeru telefone no enderesu eletróniku nian, konforme informasaun detalladu ne’ebé disponibiliza ba titulár dadus. Hodi haktuir nafatin norma legál hirak kona-ba konservasaun no transmisaun dadus bainhira hala’o investigasaun, detesaun, represaun ba krime grave, nomós ba prosesamentu seluk tuir obrigasaun legál, TT tama liu nafatin dadus tráfegu, lokalizasaun jeográfika, perfíl ka konsumu hosi Kliente/Utilizadór sira tanba TT presiza duni hodi bele hala’o servisu ne’ebé Kliente/Utilizadór sira rasik tama ona. Ho nune’e, bazeia ba lokalizasaun, perfíl ka konsumu, Kliente/Utilizadór sira sei bele asesu ba funsionalidade espesífiku servisu nian, simu sujestaun ba konteúdu no informasaun ne’ebé kona sira-nia fatin besik liu [ne’e katak servisu informativu prosimidade nian].
Informasaun kona-ba lokalizasaum bele mós rejista no fahe ho organizasaun hirak ho kompeténsia legál atu simu xamada emerjénsia, hodi hatán ba xamada ne’ebé simu.
TT halo mós prosesamentu ba dadus tráfegu, lokalizasaun jeográfika, perfíl no/ka konsumu hodi bele halo marketing ka divulgasaun oferta produtu ka servisu nian, naran katak titulár autoriza tiha. Iha momentu ne’ebé de’it, bele hasai Kliente/Utilizadór, naran katak iha konsentimentu hosi parte rua. Hala’ok ne’e la sakar fali prosesamentu ne’ebé halo tiha ona tanba ne’e bazeia de’it ba konsentimentu ne’ebé uluk iha.
BAINHIRA NO OINSÁ AMI REKOLLA ITA-NIA DADUS?
TT foti ita-nia dadus liuhosi via telefónika, ho hakerek, liuhosi website no área Kliente nian, no garante nafatin konsentimentu préviu hosi titulár.
Dadus ema nian balu presiza duni atubele ezekuta kontratu no, bainhira dadus la iha ka informasaun la natoon, TT la bele disponibiliza produtu ka servisu ne’ebé husu.
Bainhira titulár ba dadus maka la’ós TT nia Kliente/Utilizadór, dadus hirak-ne’e sei trata bainhira de’it disponibilizadu, mak hanesan liuhosi subskrisaun ho newsletter. Iha kazu hirak-ne’e sei aplika Polítika Protesaun Dadus ne’e.
Ema nia dadus ne’ebé foti tiha sei trata liuhosi informátika no tuir forma automátika ka la automátika, no haktuir beibeik lejislasaun ba protesaun dadus ema nian, ne’ebé rai hela iha baze dadus espesífiku ne’ebé iha. Kona-ba dadus ne’ebé foti, TT la bele uza ba finalidade seluk ne’ebé la iha konsentimentu hosi titulár dadus nian.
DADUS EMA NIAN MAKA BA SÉ LOOS?
Maski la sakar hasoru destinatáriu sira-ne’ebé temi tiha iha Polítika ne’e ba Protesaun Dadus Ema nian, TT, bainhira tenke hatán ba obrigasaun legál, sei bele fó Kliente/Utilizadór nia dadus ba entidade judisiál no autoridade reguladora hirak ne’ebé iha.
PROSESAMENTU EMA NIA DADUS NIA FINALIDADE NO FUNDAMENTU JURÍDIKU MAK SAIDA-SAIDA?
Haree ba jerál, dadus ema nian ne’ebé foti tiha atu uza ba jestaun relasaun kontratuál, hala’o servisu kontratadu, hatán ba Kliente/Utilizadór ninia presiza no interese, liuliu fó asesu ba funsionalidade espesífiku servisu nian, sujestaun ba konteúdu, servisu informativu prosimidade nian, informasaun no marketing, nomós inklui Kliente/Utilizadór iha lista ka diretóriu asinante nian.
Ida fali tan maka, sei bele tama liu ema nia dadus atu haktuir obrigasaun legál ruma ba kazu investigasaun, detesaun ka represaun hasoru krime grave.
Maski la sakar hasoru informasaun adisionál ruma bainhira foti dadus, TT sei bele, naran katak iha autorizasaun legál, uza dadus ema nian ne’ebé titulár fó ba finalidade seluk, hanesan atu hatán ba reklamasaun ka sujestaun, halekar TT nia informasaun institusionál no/ka fó hatene kona-ba kampaña, promosaun, publisidade no notísia kona-ba produtu ka servisu TT nian nomós atu realiza estudu merkadu ka halo inkéritu avaliasaun nian.
AMI RAI ITA-NIA DADUS TO’O BAINHIRA?
Tempu ba rai ema nia dadus kle’ur ka lae maka konforme finalidade prosesamentu ba informasaun.
Loloos, iha ezijénsia legál ruma hodi rai dadus iha tempu balu nia laran. Nune’e, bainhira la iha ezijénsia legál ida, dadus hirak-ne’e sei rai ba tempu balu nia laran hodi hatán ba finalidade ne’ebé lori rekolla no prosesamentu, tuir lei.
ITA-NIA DIREITU NU’UDAR TITULÁR MAKA SAIDA?
Bainhira sei nu’udar titulár ba Dadus, Kliente/Utilizadór sira iha garantia ba direitu atu asesu, halo retifikasaun, atualizasaun, limitasaun no apagamentu ba sira-nia dadus (menus bainhira dadus indispensavel ba prestasaun servisu sira hosi TT ne’ebé identifika iha Formuláriu nu’udar fornesimentu obrigatóriu ka atu haktuir obrigasaun legál ruma ne’ebé entidade responsavel ba prosesamentu presiza duni), no direitu atu hapara TT hodi uza dadus ba finalidade komersiál no, ne’e duni, atu hasai konsentimentu ne’ebé fó tiha ba TT, maibé kanselamentu la kona prosesamentu ne’ebé hala’o tiha tuir konsentimentu ne’ebé uluk iha.
OINSÁ MAKA BELE IHA ASESU, RETIFIKA, ATUALIZA, LIMITA, APAGA, HASORU PROSESAMENTU BA ITA-NIA DADUS, KA HAKOTU KONSENTIMENTU?
Maski la kontra lejislasaun ba protesaun ba ema nia dadus, titulár sei bele hatada, diretamente ka liuhosi hakerek rekerimentu ba Responsavel prosesamentu nian, liuhosi meius no kontaktu sira tuirmai:
- Liña Apoiu ba Kliente (172 – Kliente Pesoál; 178 – Kliente Emprezariál);
- Iha loja TT ne’ebé de’it;
- Hakerek komunikasaun ba responsavel ba prosesamentu, no haruka ba:
Timor Telecom, SA. TIMOR PLAZA Rua Presidente Nicolau Lobato 4º Piso - Caixa Postal 135 Comoro - Díli Timor-Leste
OINSÁ MAKA BELE REKUZA SIMU KONTAKTU HODI HALA’O MARKETING?
TT bele halekar informasaun ba Kliente/Utilizadór, kona-ba produtu ka servisu, liuhosi telefone, e-mail, SMS, MMS ka meius komunikasaun eletrónika seluk, bainhira titulár fó nia konsentimentu.
Bainhira titulár hosi ema nia dadus lakohi simu nafatin komunikasaun ne’e, bele, iha momentu ne’ebé de’it, hakotu nia konsentimentu kona-ba uza nia dadus ba finalidade marketing nian.
SÉ MAKA MANDÓR BA PROTESAUN DADUS NIAN?
Mandór ba protesaun dadus hala’o knaar relevante kona-ba prosesamentu ba ema nia dadus, hodi garante katak prosesamentu hotu hanesan de’it tuir lei, verifika katak hotu-hotu haktuir Polítika Protesaun ba Dadus nian no define regras ho klaru ba prosesamentu Dadus nian, hametin katak sira hotu-hotu ne’ebé fó fiar ba entrega sira-nia dadus hatene oinsá maka TT prosesa dadus hirak-ne’e nomós sira-nia direitu. Nune’e, titulár sira, hakarak karik, bele haruka komunikasaun ida ba Mandór Protesaun Dadus kona-ba asuntu Dadus nian ba kontaktu tuirmai :
Kontaktu:
Este endereço de e-mail está protegido de spam bots, pelo que necessita do Javascript activado para o visualizar
OINSÁ MAKA BELE HATO’O REKLAMASAUN?
Maski bele aprezenta reklamasaun diretamente ba TT, liuhosi kontaktu ne’ebé fó-sai tiha-ona, Kliente/Utilizadór bele hatada reklamasaun diretamente ba ANK liuhosi entidade ne’e nia kontaktu rasik.
MEDIDAS HIRAK NE’EBÉ MAKA TT ADOTA TIHA HODI HAMETIN SEGURANSA BA EMA NIA DADUS?
TT hatebes kompromisu hodi garante seguransa ba ema nia dadus ne’ebé iha ona, tanba ne’e aprova nomós implementa ho rigór regra sira kona-ba matéria ida-ne’e. Entidade hotu-hotu ne’ebé iha asesu, ne’ebé legál, tenke haktuir regras hirak-ne’e. Tanba iha preokupasaun nafatin no empeñu atu defende ema nia dadus, TT foti medidas seguransa oin-oin nu’udar karater tékniku nomós organizativu liuhosi oin ida atubele proteje ema nia dadus, hanesan defende kontra entidade seluk uza arbiru, halekar, lakon, halo alterasaun, la iha autorizasaun ba halo prosesamentu ka hetan asesu, nomós prosesamentu seluk ne’ebé kontra lei.
Hatutan tan katak entidade seluk ne’ebé, bainhira hatada servisu, hahú prosesamentu ba ema nia dadus hosi Kliente/Utilizadór iha TT nia naran ka tanba nia, iha obrigasaun, liuhosi hakerek, atu ezekuta medidas téknikas no seguransa natoon ne’ebé, iha momentu ida-idak, hatán ba rekizitu tuir lejislasaun no hametin defeza ba direitus hosi titulár dadus nian (liuliu, protesaun Kliente/Utilizadór nia dadus no privasidade).
Ne’e be, iha website hotu-hotu hosi TT, formuláriu ba foti ema nia dadus haktuir banati sesaun enkriptadu hosi Browser ba ema nia dadus hotu-hotu ne’ebé rai metin hela ho seguru iha sistema TT nian ne’ebé iha mós iha ninia Datacenter, ho medidas seguransa maka’as no lójika ne’ebé TT hatuur nu’udar indispensavel hodi fó protesaun tomak ba ema nia dadus.
Maski iha medidas seguransa ne’ebé TT adota, TT bolu atensaun ba ema hotu-hotu ne’ebé tama iha internet atu adota liután medidas seguransa hanesan hili loos PC ne’ebé atu uza, no adota mós browser ida atualizadu ho patches ne’ebé konfiguradu loos, ho firewall ativa, antivirus no anti-spyware nomós hametin katak sites hirak-ne’ebé loke ba iha internet iha reputasaun di’ak no bele fiar.
OINSÁ MAKA BELE HATENE ALTERASAUN NE’EBÉ MAKA KONA POLÍTIKA PROTESAUN BA EMA NIA DADUS HOSI TT?
TT iha direitu, iha tempu ne’ebé de’it, atu hala’o reajustamentu ka alterasaun ba Polítika Protesaun ba Ema nia Dadus ida-ne’e, no alterasaun hirak hotu publika ho klaru liuhosi kanál komunikasaun TT nian no tuir lejislasaun ne’ebé vigora hela.
|
|
